Qazaxda icra başçısı vətəndaş müraciətini dinlədi

Prezident İlham Əliyevin “Dövlət məmuru xalqa xidmət etməlidir” fikri ölkəmizdə həyata keçirilən siyasətin əsas mahiyyətini əks etdirir. Bu çağırış dövlət vətəndaş münasibətlərinin əsasını təşkil edir və məmurlar üçün fəaliyyət prinsipi rolunu oynayır.

Prezident və Birinci vitse-prezident Mehriban Əliyevanın vətəndaşlara göstərdiyi qayğı, digər məmurlar üçün nümunəvi yanaşmadır. Qazax rayonunda da vətəndaş məmnunluğuna operativ və həssas yanaşılır. Xüsusilə şəhid ailələri və müharibə iştirakçılarının sosial məsələləri diqqət mərkəzində saxlanılır.

Ulusum.az xəbər verir ki, 11 aprel tarixində Qazax Rayon İcra Hakimiyyətində mütəmadi olaraq keçirilən vətəndaş qəbulu zamanı Quşçu Ayrım kəndindən müraciət edən vətəndaşın istəyi aidiyyəti üzrə cavablandırılıb. Bu cür qəbullar dövlətlə vətəndaş arasında dialoqun davamlılığını təmin edir.

Qazax Rayon İcra Hakimiyyətinin başçısı Rəcəb Babaşov bildirib ki, Prezident İlham Əliyevin çağırışına uyğun olaraq hər bir dövlət məmuru vəzifəsinə məsuliyyətlə yanaşmalı və bu fikri özünə nümunə götürməlidir. Rayon rəhbəri Prezidentin “Siz daim insanlarla təmasda olmalısınız” sözlərinin vətəndaş məmnunluğunu əsas tutduğunu vurğulayıb. Bildirilib ki, hər bir kəndin problemi həll olunduqda, bütövlükdə ölkədə ciddi problem qalmayacaq.

Rəcəb Babaşov qeyd edib ki, vətəndaş məmnunluğu daim prioritet olaraq qalmalı və bu hər bir dövlət məmurunun əsas vəzifəsi olmalıdır. İcra başçısı keçirilən qəbulların əsas məqsədinin məhz bu olduğunu bildirib. Şəhər və kəndlərdə keçirilən görüşlərdə vətəndaşların müraciətlərinə dərhal baxıldığını və problemlərin yerində araşdırıldığını qeyd edib.

Müraciətlərin operativ həlli istiqamətində aidiyyəti qurumlara dərhal tapşırıqlar verildiyi bildirilib. O, eyni zamanda, şəhid ailələrinə, qazilərə, müharibə iştirakçılarına və sərhəd sakinlərinə xüsusi diqqət və qayğının göstərilməsinin vacibliyini vurğulayıb.