Yaponiyada hərbi təlimlər nəticəsində yaranmış yanğını söndürmək mümkün olmur

Yaponiyanın qərbində baş verən və hərbi təlimlər nəticəsində yaranmış ola biləcək yanğını yanğınsöndürənlər artıq ikinci gündür ki, söndürməyə çalışırlar. “Ulusum”.az xəbər verir ki, bu barədə Yaponiyanın ictimai televiziya kanalı məlumat yayıb.

Yayımlanan görüntülərə əsasən, yanğın Xirosima prefekturasında yerləşən Etaşima şəhəri yaxınlığındakı dağ-meşə massivinin geniş bir sahəsini əhatə edib. İlkin məlumata görə, hadisə nəticəsində xəsarət alan olmayıb. Yanğının yaxınlaşdığına görə, yanvarın 17-də hakimiyyət orqanları qocalar evinin sakinlərini təxliyə edib.

Mütəxəssislər yanğının yaranma səbəblərini araşdırırlar. İlkin ehtimallara görə, yanğın Yaponiya Özünümüdafiə Qüvvələrinin partlayıcı maddələr, o cümlədən dinamit istifadə etdiyi təlim atışları nəticəsində başlaya bilər.

Səidə Mustafa