NATO - nun Baş katibi Alyansı müharibəyə hazırlaşmağa çağırıb

NATO-nun Baş katibi Mark Rutte, Şimali Atlantika Alyansı ölkələrini müharibənin qarşısını almaq məqsədilə hərbi hazırlıqlara başlamağa çağırıb. Brüsseldə baş qərargah rəisləri səviyyəsində keçirilən iclas zamanı Rutte, Blok üzvlərinə müdafiə xərclərini artırmağı və "düşüncə tərzini hərbi dövrə uyğunlaşdırmağı" tövsiyə edib.

Onun sözlərinə görə, təhlükəsizlik və müdafiə sahəsindəki mövcud təhdidlər NATO ölkələrinin strateji hazırlıq səviyyəsini artırmasını tələb edir. Hərbi xərclərin artırılması, müasir texnologiyaların tətbiqi və orduların daha çevik olması üçün birgə tədbirlər həyata keçirilməsi vacibdir.

"Biz müharibənin qarşısını almaq üçün ona hazırlaşmalıyıq. Bunun üçün daha çox resurs ayırmalı və kollektiv müdafiəni gücləndirməliyik," — deyə Rutte vurğulayıb.

Bu bəyanat, NATO-nun son dövrlərdə təhlükəsizlik məsələlərinə diqqətinin artmasını və kollektiv müdafiə strategiyalarının inkişafını bir daha ön plana çıxarır.

Səidə Mustafa