Qızıl külçə, Mercedes və nağd pul – Nadine Menendesin rüşvət qalmaqalı

Nyu-York məhkəməsi sabiq ABŞ senatoru, Demokrat Bob Menendesin həyat yoldaşı Nadine Menendes (əslən Arslanyan) haqqında hökm çıxarıb. Əslən livanlı erməni olan 58 yaşlı Nadine 4 il yarım həbs cəzası alıb.

Onun günahı — ərinə siyasi təsir imkanlarını işə salmaq üçün nağd pullar, qızıl külçələr və Mercedes-Benz avtomobili şəklində rüşvət almaq. Federal məhkəmə onu Manhettendə 15 bənd üzrə təqsirli bilib. Prokurorlar isə onu rüşvət sxeminin əsas fiquru sayaraq ən azı 7 il həbs tələb edirdilər.

Sabiq senator Bob Menendes də eyni iş üzrə 11 il həbs cəzasına məhkum olunub. Hökm 17 iyunda qüvvəyə minib.

Xatırladaq ki, Bob Menendes 2020-ci ildə Nadine Arslanyanla evlənmişdi. Kiçik nikah mərasimi Kuinsdəki erməni kilsəsində baş tutmuşdu. Arslanyanın Menendesin siyasi mövqeyinə ciddi təsir etdiyi bildirilir — məhz onun təsiri ilə senator Azərbaycan və Türkiyə əleyhinə kampaniyalar aparmaqla yadda qalıb.

Ulusum.az