Tramp Baydenin dindirilmə yazılarını açıqlayır – yaddaş problemi gündəmdə

ABŞ-ın prezidenti Donald Trampın administrasiyası, Cozef Baydenin gizli sənədlərin qanunsuz saxlanılması işi üzrə dindirilməsinə dair audioyazıların ictimaiyyətə açıqlanmasına hazırlaşır. The New York Times nəşrinin yazdığına görə, Baydenin yaddaşı ilə bağlı problemlərin qeydə alındığı bu lent yazıları artıq gələn həftə yayımlana bilər.

2024-cü ilin fevralında xüsusi prokuror Robert Hör istintaq zamanı pozuntular aşkar etsə də, Baydenə qarşı ittiham irəli sürməkdən imtina etmişdi. Öz hesabatında o, həmin dövrdə prezident olan Baydenin tərcümeyi-halına dair əsas tarix və hadisələri xatırlamaqda ciddi çətinliklər yaşadığını qeyd etmişdi.

Bayden administrasiyası bu materialların dərcini əngəlləməyə çalışaraq bildirmişdi ki, belə bir addım gələcəkdə oxşar istintaqlara maneə törədə bilər. Trampın bu yazıları yayımlamaq qərarı isə ABŞ-da siyasi çevrələrdə ciddi müzakirələrə səbəb olub.

Donald Tramp dəfələrlə Baydenin qərarlarını və hərəkətlərini tənqid edib. O, xüsusilə 14 aprel 2021-ci ildə Bayden tərəfindən təsdiqlənmiş ABŞ qoşunlarının Əfqanıstandan çıxarılmasını ölkə tarixindəki “ən biabırçı gün” adlandırıb.

✍️"Ulusum".az