Soydaşımız BMT-də ECOSOC-un Gənclər Forumunda iştirak edib

ICESCO-nun Gənc Sülh səfiri, Misirdəki Azərbaycan diasporunun fəalı Sandi Salem Nyu Yorkda yerləşən BMT-nin binasında İqtisadi və Sosial Şuranın (ECOSOC) Gənclər Forumunda iştirak edib.

Forumun keçirilməsində məqsəd gəncləri dünyanın sosial, iqtisadi və ekoloji inkişafı ilə əlaqədar qərarların qəbuluna cəlb etməkdir.

Tədbirdəki çıxışında soydaşımız ixtira etdiyi SIMON (Smart Instrument for Mute and Oto-Laringeal Non Speakers) cihazı haqqında məlumat verib. Cihazın süni intellektlə təchiz olunduğunu, nitq və eşitmə əngəlli insanlar üçün nəzərdə tutulduğunu bildirib. Sandi Salem gənclərin yüksək səviyyəli qərarların qəbul olunması proseslərində iştirakının vacibliyini diqqətə çatdırıb.

Gənc sülh səfiri forum çərçivəsində keçirilən “Gənclər ön cəbhədə: Elmin və sosial inklüzivliyin səfərbər olunması” adlı tədbirdə və Qətərin BMT-də Gənc Nümayəndələr Proqramının təqdimatında iştirak edib, həmçinin BMT-nin televiziyasının ərəb dilində xidmətinə (UN TV Arabic) müsahibə verib.

Qeyd edək ki, Sandi Salem Misirin Qahirə şəhərində Ayn Şəms Dövlət Tibb Universitetinin 3-cü kurs tələbəsidir. 2024-cü ildə Laçında keçirilən Diaspor Gənclərinin V Yay Düşərgəsinin iştirakçısı olub, ərəb dilində bir sıra kitabların müəllifidir. O, Misirlə yanaşı, ABŞ, Böyük Britaniya, İndoneziya, Çin, Malayziya, Cənubi Koreya, BƏƏ və digər ölkələrdə keçirilmiş beynəlxalq tədbirlərdə yüksək mükafatlara və təltiflərə layiq görülüb.

✍️"Ulusum".az