Bakı şəhərində bəzi küçə və prospektlərdə nəqliyyat məhdudlaşdırılacaq

20 Yanvar - Ümumxalq Hüzn Günü ilə əlaqədar paytaxt Bakıda bəzi küçə və prospektlərdə nəqliyyatın hərəkətinə məhdudiyyət qoyulmaqla istiqamətlər dəyişdiriləcək.

Bu barədə Ulusum.az-a Daxili İşlər Nazirliyinin mətbuat xidmətindən məlumat verilib.

Yanvarın 20-də səhər saat 08:00-dan 20 Yanvar faciəsi qurbanlarının xatirəsinə həsr olunmuş mərasim başa çatana qədər bəzi küçə və prospektlərdə avtomobil hərəkəti məhdudlaşdırılacaq.

Hərəkət məhdud olacaq yerlər arasında Mikayıl Müşfiq küçəsi ilə Hüseyn Cavid prospektinin kəsişməsi, Mikayıl Müşfiq dairəsi ilə Mətbuat prospektinin kəsişməsi, Mehdi Hüseyn küçəsi, Teleteatr binasının qarşısı, İzzət Nəbiyev və Abbasqulu Abbaszadə küçələrinin kəsişməsi, eləcə də Milli Məclisin arxa hissəsindən Parlament prospekti – Şəhidlər xiyabanı istiqaməti qeyd olunur.

Sürücülərə şəxsi avtomobildən mümkün qədər az istifadə etmələri və ictimai nəqliyyata üstünlük vermələri tövsiyə olunur.

Məhdudiyyət mərasim iştirakçılarının təhlükəsiz və fasiləsiz hərəkətini təmin etmək məqsədilə tətbiq olunur.

Ulusum.az