Fransa büdcəsi "Pəhrizə" düşür: Hökumət 40 milyard avro qənaət edəcək

Fransa hökuməti 2026-cı ilə qədər büdcə kəsirini 4,6%-ə endirməyi planlaşdırır, amma bunun üçün ciddi şəkildə "kəməri sıxmaq" lazım olacaq. Fransanın iqtisadiyyat və maliyyə naziri Erik Lombardın sözlərinə görə, bu məqsədə çatmaq üçün təxminən 40 milyard avro qənaət edilməlidir.

Lombard BFMTV-yə verdiyi müsahibədə ölkənin dövlət borcunun artıq 3 trilyon avronu keçdiyini və hər il kreditorlara getdikcə daha çox pul ödəməli olduqlarını vurğulayıb. “Keçən il 50 milyard avro, bu il isə artıq 70 milyard avro – bu rəqəmlər müdafiə büdcəsindən belə böyükdür. Artıq bu, fövqəladə vəziyyətdir,” – deyə nazir açıq etiraf edib.

2025-ci ildə büdcə kəsiri 5,4% səviyyəsində qalacaq, lakin növbəti il bu göstərici azaldılmalıdır. Və bu azalma yalnız bir yolla mümkündür: dövlət xərclərinə “diyet” yazmaqla. Qənaət planı əsasən israfın azaldılması və mövcud resurslardan daha səmərəli istifadə ilə həyata keçiriləcək.

Lombard həmçinin 250 min avrodan çox gəlir əldə edənlərə tətbiq olunan “yüksək gəlir vergisi”nin daimi olmasını təklif edib. Amma eyni zamanda vəd edib ki, yeni vergilər gündəmdə deyil – hələlik…