AZAL 2025-ci ilin ilk rübü üzrə yüksək nəticələr əldə edib

Azərbaycan Hava Yolları (AZAL) 2025-ci ilin ilk üç ayında yüksək göstəricilərlə fəaliyyətini davam etdirib. Şirkət 48 istiqamət üzrə ümumilikdə 3,718 reys yerinə yetirib və uçuşlarının 89%-ini vaxtında icra edib. Bu nəticələr 2024-cü ilin eyni dövrü ilə müqayisədə punktuallıq üzrə 1%, reyslərin sayı üzrə isə 4% artım olduğunu göstərir. Üstəlik, 2025-ci ilin mart ayında punktuallıq göstəricisi 93%-ə çatıb, bu da AZAL-ın xidmət keyfiyyətindəki müsbət inkişafı əks etdirir.

"Ulusum". az AZƏRTAC-a istinadən bildirir ki, hesabat dövründə AZAL 865,000 sərnişin daşıyıb, bu isə ötən ilin eyni dövrü ilə müqayisədə 7% artım deməkdir. Sərnişin axınının ən yüksək həddi 12,350 nəfər olmaqla 2025-ci ilin 12 yanvarında qeydə alınıb. Ötən ilin eyni dövründə ən yüksək sərnişin axını isə 11,200 nəfər olub.

AZAL bu göstəricilərlə öz müştərilərinə yüksək xidmət keyfiyyəti və komfortlu uçuşlar təmin etdiyini bir daha sübut edib. Şirkət marşrut şəbəkəsini genişləndirərək daha çox istiqamət təklif etməyə və xidmətlərini daha da yaxşılaşdırmağa davam edir.