“1998 il həbs cəzası tələb olunur”: Türkiyədə oteldəki yanğınla bağlı istintaq başa çatdı

Türkiyənin Bolu bölgəsində yerləşən “Grand Kartal” dağ-xizək kurortundakı oteldə yanvar ayında baş verən və 78 nəfərin həyatını itirməsi ilə nəticələnən dəhşətli yanğınla bağlı istintaq tamamlanıb.

Anadolu Agentliyinin məlumatına görə, prokurorluq bu iş üzrə otel sahibləri və vəzifəli şəxslər də daxil olmaqla 13 nəfərə qarşı 1998 il həbs cəzası tələb edir.

Türkiyənin ədliyyə naziri Yılmaz Tunç bu barədə açıqlama verərək deyib:

“Bu dəhşətli hadisədə məsuliyyət daşıyan şəxslərin ədalət qarşısında cavab verəcəyinə və müstəqil, qərəzsiz məhkəmə sistemimizin tam şəkildə ədaləti təmin edəcəyinə heç kimin şübhəsi olmasın.”

Fəlakətin səbəbi: nasaz elektrik və açıq qapı

İstintaqın nəticələrinə əsasən, 21 yanvar tarixində baş verən yanğının mətbəxdəki nasaz elektrik qrilindən qaynaqlandığı müəyyən edilib. Qrilin həddindən artıq qızması qısaqapanmaya səbəb olub. Otel əməkdaşlarının açıq qoyduğu mətbəx qapısı alovun və zəhərli tüstünün sürətlə binaya yayılmasına şərait yaradıb. Hadisə zamanı oteldə 237 qonaq qalırdı.

Əsas təqsirləndirilənlərlə yanaşı, otel əməkdaşlarından daha 19 nəfər də səhlənkarlığa görə 22,5 ilə qədər həbs tələbi ilə üzləşir.

Cinayət işi Bolu Ağır Cəza Məhkəməsinə göndərilib.

✍️"Ulusum".az