Yatarkən telefonu yastıq altına qoymaq təhlükəlidir

Mütəxəssislər bildirir ki, smartfonun mavi işığı yuxunu pozur, psixoloji asılılıq yaradır və uzunmüddətli sağlamlıq risklərini artırır.

Ulusum.az xəbər verir ki, alimlər telefonu yastığın altında və ya baş nahiyəsinə yaxın saxlamağın yuxu keyfiyyətinə və psixoloji vəziyyətə mənfi təsir göstərdiyini bildirirlər. Smartfon ekranından yayılan mavi işıq melatonin hormonunun ifrazını azaldır. Nəticədə yuxuya getmək çətinləşir və gecə ərzində tez-tez oyanmalar müşahidə olunur.

Mütəxəssislər həmçinin “nomofobiya” – telefonsuz qalmaq qorxusu sindromunun yayıldığını bildirirlər. Bu zaman insanda narahatlıq, əsəbilik və fiziki diskomfort yarana bilər.

Bundan başqa, elektromaqnit şüalanması və cihazın gecə boyu şarjda qalması həm sağlamlıq, həm də yanğın riski baxımından təhlükə yarada bilər. Xüsusilə uşaqlar və yeniyetmələr bu risklərə daha həssas hesab olunur.

Ekspertlər gecə saatlarında telefonu söndürməyi və ya yataqdan uzaq məsafədə saxlamağı tövsiyə edirlər.

Ulusum.az