Sabirabadda körpə ölümü: Prokurorluq araşdırma başlatdı

"Ulusum.az" APA-ya istinadən xəbər verir ki, Sabirabad Rayon Mərkəzi Xəstəxanasının nəzdindəki Perinatal Mərkəzdə 2 döl və 1 körpənin ölüm faktı ilə bağlı araşdırma başlanıb. Prokurorluq hadisə ilə əlaqədar araşdırmalara başlayıb. TƏBİB, Sabirabadda son 10 gün ərzində baş verən bu faciəli hallarla bağlı məlumat yayıb.

Məlumata görə, 23 mart tarixində 38-39 həftəlik hamilə olan 2005-ci il təvəllüdlü qadın xəstəxanaya yerləşdirilib və 3000 qr ölü döl dünyaya gətirilib. 24 martda isə 28-29 həftəlik hamilə olan başqa bir qadın ağır dərəcəli preeklampsiya ilə xəstəxanaya qəbul edilib, körpə qeysəriyyə əməliyyatı ilə doğulub, lakin 820 qr çəkisi olan körpə aparılan reanimasiya tədbirlərinə baxmayaraq vəfat edib.

Həmçinin, 39-40 həftəlik hamilə olan başqa bir qadın da xəstəxanaya qəbul edilərək ölü döl xaric edilib. Hər üç zahı müvafiq müalicə alaraq vəziyyətləri stabilləşib.