Ermənistanda siyasi qarşıdurma dərinləşir: Baş müxalif arxiyepiskop həbs olunub

Ermənistanda tanınmış müxalif fiqur Arxiyepiskop Bağrat Qalstanyan "Yerevan-Kentron" cəzaçəkmə müəssisəsinə köçürülüb. Bu müəssisə Ermənistan Milli Təhlükəsizlik Xidmətinin binasında yerləşir və hazırda orada iş adamı Samvel Karapetyan da saxlanılır.

Səbəb açıqlanmır

Qalstanyanın hansı səbəblə ora göndərildiyi açıqlanmasa da, onun rəhbərlik etdiyi “Müqəddəs Mübarizə” hərəkatı və Baş nazir Nikol Paşinyanın onu açıq şəkildə siyasi rəqib kimi görməsi bu addımın siyasi motivli ola biləcəyi ehtimalını gücləndirir.

Paşinyan mükafatlandırmaq istəyir

Baş nazir Paşinyan Qalstanyan və tərəfdarlarının həbslərini həyata keçirən hüquq-mühafizə orqanı əməkdaşlarını mükafatlandırmaq niyyətində olduğunu açıqlayıb. O, bu qərarını prezidentlə də müzakirə etdiyini bildirib.

Karapetyanın əmlakı milliləşdirilə bilər

Eyni zamanda, Paşinyan "Ermənistan Elektrik Şəbəkələri" ASC-nin milliləşdirilməsi üçün qanun layihəsinin artıq hazır olduğunu və parlamentin növbədənkənar iclasında qəbul ediləcəyini bildirib.

Bu hadisələr Ermənistan daxilində siyasi gərginliyin artdığını və müxalifətə qarşı təzyiqlərin gücləndiyini göstərir.

Ulusum.az