Trampdan İrana qarşı hərbi siqnal: “Qərarımı son anda verəcəyəm”

Wall Street Journal-ın danışıqlardan məlumatlı mənbələrə əsaslanan xəbərinə görə, Donald Tramp ABŞ-ın İrana qarşı hücum planlarına yaşıl işıq yandırıb.

Mənbələrin bildirdiyinə görə, Tramp çərşənbə axşamı gecə saatlarında keçirilən gizli toplantıda ABŞ-ın İrana qarşı hərbi planlarını səssizcə təsdiqləyib. Lakin o, Tehranın nüvə proqramından imtina edib-etməyəcəyini gözləmək üçün hələlik son əmri verməyi ertələyib.

MÜMKÜN İLK HƏDƏF — FORDO NÜVƏ OBYEKTI

Məlumata görə, ABŞ-ın mümkün ilk hədəflərindən biri İranın yerin altında yerləşən Fordo uran zənginləşdirmə obyektidir.

Qeyd edək ki, Tramp iyunun 17-si gecəsi Ağ Evin fövqəladə vəziyyət otağında yüksək vəzifəli rəsmilərlə birlikdə İsrailin İranla qarşıdurmasından sonra bölgədəki vəziyyəti və ABŞ-ın mümkün müdaxiləsini müzakirə edib.

Dünən jurnalistlərə verdiyi açıqlamada Tramp deyib: “Yaxın Şərqdə münaqişəyə qarışmaq istəmirəm. Nə edəcəyimlə bağlı fikirlərim var, amma hələlik son qərarı verməmişəm. Hərbi vəziyyətdə hər şey dəyişə bildiyi üçün son qərarımı axırıncı saniyəyə qədər saxlamaq istəyirəm.”

Ulusum.az