Anadangəlmə Xəstəliklərdən Qorunma: Hamiləlikdə Müayinələrin Əhəmiyyəti

Yeni araşdırmalar anadangəlmə infeksiyanın körpələr üzərindəki ciddi təsirlərini ortaya qoyub. London Gigiyena və Tropik Tibb Məktəbinin (LSHTM) Braziliyanın Sağlamlıq Məlumatları və Biliklərinin İnteqrasiyası Mərkəzi (CIDACS) ilə apardığı araşdırmaya görə, bəzi yenidoğulmuşlar artıq həyatlarının ilk günlərindən gizli bir təhlükə ilə üzləşirlər: anadangəlmə sifilis.

Hamiləlik dövründə anadan keçən bu infeksiya, körpənin gələcək həyatını ciddi şəkildə təsir edə bilər. Araşdırmanın nəticələrinə görə, doğuş zamanı anadangəlmə sifilis diaqnozu qoyulan körpələrin həyatlarının ilk beş ilində xəstəxanaya düşmə riski 6 dəfə, həyatlarının ilk ayında isə 11 dəfə artır.

Sifilisin törədicisi olan Treponema pallidum bakteriyası plasenta vasitəsilə dölə ötürülür. Bu, bir sıra ciddi nəticələrə səbəb ola bilər, o cümlədən:
- Ölüm və vaxtından əvvəl doğuşlar,
- Karlıq, korluq və nevroloji problemlər,
- Skelet deformasiyaları.

Hamiləlik zamanı ananın müalicəsi belə, körpənin yoluxmasını tamamilə əngəlləyə bilmir. Ümumdünya Səhiyyə Təşkilatının məlumatlarına görə, 2022-ci ildə 700 min anadangəlmə sifilis hadisəsi qeydə alınıb və bu, on minlərlə körpə ölümünə səbəb olub.

Xəstəliyin artımı, həm aşağı, həm də yüksək gəlirli ölkələrdə ciddi narahatlığa səbəb olur. Həkim Enni Da Payşao Kruz, sifilis infeksiyalarının qarşısını almaq və müalicə etmək mümkün olduğunu, amma buna baxmayaraq, hər il minlərlə qadın və uşağın bu xəstəlikdən ciddi şəkildə təsirləndiyini bildirib. O, ictimai səhiyyə təşəbbüslərini genişləndirməyi və prenatal testlərin əhatə dairəsini artırmağı tövsiyə edir.

Professor Mariya Yuri İçihara isə anadangəlmə sifilisin uzunmüddətli nəticələrini minimuma endirmək üçün skrininq proqramlarının və izləmə strategiyalarının təkmilləşdirilməsinin vacibliyini vurğulayır. Bu, yalnız körpələrin sağlamlığını deyil, həm də gələcəkdəki nəsillərin rifahını qorumaq üçün önəmlidir.

✍️"Ulusum".az