Ukraynada sülhməramlılar Avropanı müharibəyə sürükləyə bilərmi?

Rusiya xarici işlər naziri Sergey Lavrov bəyan edib ki, ABŞ-da və BRİKS-ə daxil olmayan bəzi digər ölkələrdə Üçüncü dünya müharibəsinin başlanmasının yolverilməzliyi artıq dərk olunur. Bu barədə o, Braziliyada keçirilən BRİKS ölkələrinin xarici işlər nazirlərinin toplantısından sonra danışıb. Xəbəri TASS yayıb.

“Xüsusilə ABŞ-ın vitse-prezidenti Cey Di Vens bu yaxınlarda bu barədə danışdı və Ukrayna rejimini müharibəni davam etdirməyə təhrik edənləri xəbərdar etdi,” – deyə Lavrov bildirib.

Lavrov həmçinin qeyd edib ki, Avropa sülhməramlılarının Ukraynaya yerləşdirilməsi Avropanın Rusiya ilə birbaşa münaqişəyə cəlb olunmasına səbəb ola bilər.

Eyni gün Belarus prezidenti Aleksandr Lukaşenko da çıxış edərək bildirib ki, dünya mediasında gedən “şüur uğrunda mübarizə” istənilən an real müharibəyə çevrilə bilər.

🔹 BRİKS — hazırda 9 ölkədən ibarət bir birlikdir: Rusiya, Braziliya, Hindistan, Çin, Cənubi Afrika, İran, BƏƏ, Misir və Efiopiya. Təşkilat 2006-cı ilin iyununda Sankt-Peterburq iqtisadi forumunda yaradılıb.
2009-cu ildən bəri BRİKS ölkələrinin liderləri rəsmi sammitlər keçirir, həmçinin xarici işlər, maliyyə və digər sahələr üzrə nazirlərin də görüşləri baş tutur.

✍️"Ulusum".az