Papa Fransisk şənbə günü, aprelin 26-da dəfn olunacaq

Roma papası Fransiskin dəfn mərasimi 26 aprel şənbə günü saat 10:00-da başlayacaq, konklav isə 5-10 may arasında keçiriləcək.

"Ulusum".az Vatican News-a istinadən xəbər verir ki, vida və dəfn mərasiminin təşkilatçılığı məsələləri kardinallar tərəfindən 22 aprel səhəri Sinod zalında keçirilən konqreqasiyada müəyyənləşdirilib.

Xatirə mərasimini kurial kardinal Giovanni Battista Re idarə edəcək. 23 aprel çərşənbə günü saat 09:00-da Fransiskin cənazəsi Vatikanın Müqəddəs Marta Kappellasından Roma şəhərindəki Müqəddəs Pyotr Bazilikasına aparılacaq. Bu, papanın son iradəsi və "Ordo Exsequiarum Romani Pontificis" sənədinin yenilənmiş versiyasına uyğun olaraq həyata keçiriləcək.

Ehtimal olunur ki, 22 aprel tarixində İtaliya hökuməti ölkədə üç günlük milli matəm elan edəcək. Dəfn mərasimlərinin təşkilatçılığını isə İtaliyanın Vətəndaş Müdafiəsi Departamentinin rəhbəri Fabio Çiçilyano koordinasiya edəcək. Çiçilyano, 2005-ci ildə Papa II Yəhya Paulusun dəfnində də iştirak etmişdi.

Papa Fransisk öz vasiyyətində Roma şəhərindəki ən qədim kilsələrdən biri olan Santa-Maria-Majjore Kilsəsində dəfn edilməsini istəmişdi. Bu, adətən Roma katolik kilsəsinin başçılarının Vatikan ərazisində dəfn edilməsi ənənəsinə qarşı bir dəyişiklikdir.