ABŞ-dan Makrona "zərif təzyiq": Trampın adamları Parisdə

Donald Trampın yaxın müttəfiqləri Marko Rubio və Stiv Vitkoffun Parisə səfəri fonunda Fransaya qarşı diplomatik təzyiqlərin yeni mərhələyə keçdiyi müşahidə olunur. Rəsmi məlumatlarda bu səfər “rutin məsləhətləşmələr” kimi təqdim olunsa da, “Blick” nəşrinin yazdığına görə, əslində söhbət Emmanuel Makronun son təşəbbüslərinə Vaşinqtonun açıq narazılığından gedir.

Mənbələrin bildirdiyinə görə, ABŞ-ı narahat edən iki əsas məsələ var:

Fransanın təşəbbüsü ilə atəşkəsdən sonra Avropa hərbi qüvvələrinin Ukraynaya yerləşdirilməsi ideyası – bu, Vaşinqtonun nəzarət edə bilmədiyi bir Avropa hərbi varlığı anlamına gələ bilər.

Fələstin dövlətinin tanınması məsələsi – Parisin bu addımı atacağı təqdirdə, Fransa regionda ABŞ-ın illərdir qoruduğu status-kvonu açıq şəkildə sarsıda bilər.

Rəsmi səfər adı altında gerçəkləşən bu görüş, əslində ABŞ-ın Makrona bir xəbərdarlığı kimi də oxuna bilər. Həm də bu, Tramp komandası vasitəsilə verilən mesajdır: “Biz hələ buradayıq və nə baş verdiyini izləyirik.”