İnanc və təhlükə arasında: Zəvvarların ziyarəti və vəba şoku

İnanclar uğrunda səyahət bəzən gözlənilməz təhlükələrlə də müşayiət oluna bilər. Hollandiyanın De Telegraaf nəşri xəbər verir ki, Avropadan olan 7 turist Efiopiyanın məşhur müqəddəs Bermel Giyorgis bulağını ziyarət etdikdən sonra vəba xəstəliyinə yoluxub. Xəstələrin üçü Almaniya, dördü isə Böyük Britaniya vətəndaşıdır.

Turistlər dini ayin çərçivəsində ya yerli sudan içib, ya da onunla üzlərini yuyublar. Nəticədə isə yoluxucu xəstəlik onlara ciddi zərbə vurub. Xoşbəxtlikdən xəstələrin əksəriyyəti sağalsa da, ikisinin vəziyyəti ağır olaraq reanimasiyada qalır.

Ən qorxulusu isə, bu dəfəki yoluxmanın antibiotiklərə davamlı vəba ştammı ilə bağlı olmasıdır. Həkimlər bunun Avropaya nadir hallarda rast gəlinən Afrika vəbasının idxalı olduğunu bildirirlər.

Ziyarət edilən bulaq Efiopiya pravoslav Tevahedo kilsəsinə aiddir və minlərlə zəvvarın mənəvi təmizlənmək üçün getdiyi müqəddəs məkan sayılır. Qeyd edək ki, 2022-ci ildə həmin bölgədə baş verən vəba epidemiyası nəticəsində 58 mindən çox insan xəstələnmişdi.

Həkimlər turistləri xəbərdar edir: ekzotik ölkələrə səyahət zamanı yalnız qablaşdırılmış və təhlükəsiz sudan istifadə edin. Çünki belə yerlərdə sadə bir içki bəzən sağlamlığınızı təhdid edə bilər.