Qlobal nüvə qışı: yalnız bu 5 ölkə ayaqda qala bilər

“Risk Təhlili” jurnalında dərc olunmuş tədqiqata görə, əgər Rusiya ilə NATO arasında nüvə silahlarından istifadə edilən qlobal müharibə baş verərsə, planetin yalnız bir neçə bölgəsi həyat üçün uyğun qala bilər. Alimlərin qənaətinə əsasən, Yeni Zelandiya, Solomon adaları, Avstraliya, İslandiya və Vanuatu bu ssenaridə sağ qalmaq ehtimalı ən yüksək olan ölkələrdir.

Bu ada və yarımada dövlətlərinin üstünlüyü ondan ibarətdir ki, sənaye çöküşü və iqlim dəyişikliklərinə baxmayaraq, kənd təsərrüfatı sistemlərini davam etdirə biləcəklər. Nəşr qeyd edir ki, qlobal “nüvə qışı” nəticəsində hava temperaturunun kəskin azalması və günəş radiasiyasının zəifləməsi dünyada ərzaq istehsalını, xüsusilə Şimal yarımkürəsində, demək olar ki, tamamilə dayandıra bilər.

Hesablamalara görə, belə bir qarşıdurma nəticəsində atmosferə 150 teraqram his yayıla və nəticədə kənd təsərrüfatı məhsuldarlığı dünya üzrə 80%, Şimal yarımkürəsində isə 100%-ə qədər azala bilər.

Lakin yuxarıda adı çəkilən ölkələr özlərini kənd təsərrüfatı məhsulları ilə təmin etmə gücünə sahib olduqları üçün, hətta bu cür ağır qlobal böhranda belə nisbətən sabitliklərini qoruyub saxlaya bilərlər.