Məktəblilərarası Milli Hakaton – 2025, Gələcəyin İT mütəxəssisləri yetişir

Elm və Təhsil Nazirliyinin dəstəyi və “Rəqəmsal bacarıqlar” layihəsinin təşkilatçılığı ilə keçirilən “Məktəblilərarası Milli Hakaton – 2025” müsabiqəsinin əyani mərhələsi 22-25 aprel tarixlərində davam edir.

Mart ayında keçirilən ilkin mərhələdə 300 mindən çox şagird iştirak edib. Onlardan 15 minə yaxın yüksək nəticə göstərən şagird hazırda əyani mərhələdə bilik və bacarıqlarını sınayır.

Əyani mərhələ, təhlükəsizlik və şəffaflıq prinsiplərinə əsaslanaraq, rəqəmsal avadanlıqlarla təchiz olunmuş mərkəzlərdə, mərkəzləşdirilmiş qaydada və elektron sistem üzərindən həyata keçirilir. Bu yanaşma, təhsil alanların bilik və bacarıqlarının obyektiv qiymətləndirilməsinə şərait yaradır.

Məktəbəqədər və Ümumi Təhsil üzrə Dövlət Agentliyinin sektor müdiri Nilufər Rəhimova bildirib ki, müsabiqə zamanı şagirdlər arasında proqramlaşdırma sahəsinə böyük maraq müşahidə olunur. Onlar bu layihəni maraqlı və gələcək İT karyeraları üçün əhəmiyyətli bir addım kimi qiymətləndirirlər.

Müsabiqənin əsas məqsədi məktəblilər arasında rəqəmsal bacarıqların inkişafına dəstək olmaq, proqramlaşdırma sahəsində biliklərini artırmaq və İT üzrə istedadlı məktəbliləri müəyyən edərək onlar üçün gələcək inkişaf imkanları yaratmaqdır.



✍️ "Ulusum".az