Azərbaycan və Türkiyə arasında qida təhlükəsizliyi üzrə əməkdaşlıq gücləndirilib

Azərbaycan Respublikası Qida Təhlükəsizliyi Agentliyinin (AQTA) “1003 – Çağrı Mərkəzi” ilə Türkiyənin Kənd Təsərrüfatı və Meşə Nazirliyinin “Alo174” qida xətti arasında təcrübə mübadiləsi həyata keçirilib.

Bu əməkdaşlıq çərçivəsində tərəflər vətəndaş müraciətlərinin qəbul edilməsi, operativ cavablandırılması və nəticələrin çatdırılması sahəsindəki təcrübələrini bölüşüblər.

Mübadilə zamanı “1003 – Çağrı Mərkəzi”nin əməkdaşı “Alo174” qida xəttində vətəndaş müraciətlərinin dinlənilməsi, cavablandırılması və aidiyyəti orqanlara çatdırılması proseslərini izləyib. Eyni zamanda, Türkiyəli həmkarlarına “1003 – Çağrı Mərkəzi”nin fəaliyyəti barədə ətraflı məlumat verilib və bu sahədəki təcrübələr paylaşılıb.

"Ulusum".az xəbər verir ki, bu təcrübə mübadiləsi, hər iki qurumun vətəndaş məmnuniyyətini artırmaq və qida təhlükəsizliyi sahəsində operativ xidmətlərin keyfiyyətini yüksəltmək məqsədilə həyata keçirilmişdir.