Samsung 2 ildən çox istifadə olunmayan hesabları siləcək

Samsung korporasiyası istifadəçilərinə qeyri-aktiv hesabların silinməsi barədə xəbərdarlıq edib. Bu barədə ixtisaslaşmış SamMobile nəşri diqqət çəkib.

Şirkət bildirib ki, qeyri-aktiv hesablarla bağlı yeni təhlükəsizlik siyasəti tətbiq ediləcək və hesabların silinmə şərtlərini açıqlayıb. Samsung nümayəndələrinin sözlərinə görə, hesab 24 ay və ya daha uzun müddət istifadə edilmədikdə silinəcək.

Şirkət qeyd edib ki, 2025-ci ilin 31 iyulundan etibarən ən azı iki ildir aktiv olmayan hesablar silinməyə başlanacaq. Samsung bu addımın müştəri məlumatlarının qorunması məqsədi daşıdığını bildirib. Silinmiş hesabların bərpası mümkün olmayacaq.

SamMobile jurnalistləri istifadəçilərə məsləhət görüb ki, əgər hesabınızı iki il ərzində istifadə etməmisinizsə, onu aktiv saxlamaq üçün hesabınıza daxil olun və ya Samsung xidmətlərindən, məhsullarından istifadə edin. Bundan əlavə, Samsung qeyri-aktiv hesab sahiblərini e-poçt vasitəsilə xəbərdar etməyə çalışacaq.

Ulusum.az