Bu gün, 12:30 0 Sağlamlıq

Stresi “şirniyyatla boğmaq” — Bədxəbər kortizoldan xəbəriniz varmı?

Stres zamanı ifraz olunan kortizol hormonu iştahanı artırır, — bu barədə NEWS.ru saytına psixoloq Yuliya Korolyova bildirib. Onun sözlərinə görə, bu hal insanın təkamül mexanizmi ilə bağlıdır: orqanizm enerjini sürətlə bərpa etmək üçün şirin və yağlı qidalara üstünlük verir.

“Streslə həddindən artıq yemək arasındakı əlaqə həm fizioloji, həm də psixoloji mexanizmlərlə izah olunur. Stres zamanı orqanizmdə kortizol hormonunun səviyyəsi artır və bu da öz növbəsində iştahanı, şirin və yağlı yeməklərə olan istəyi gücləndirir. Bu, təhlükə zamanı enerjini tez bərpa etməyə yönəlmiş ehtiyatlı təkamül reaksiyasıdır”, – deyə Korolyova qeyd edib.

O əlavə edib ki, stres "xoşbəxtlik hormonu" olan serotoninin səviyyəsini aşağı salır, lakin karbohidratlar bu hormonu qaldıra bilər. Bu səbəbdən insanlar stres zamanı şokolad, bulka, tort, pirojna və peçenye kimi məhsullara meyil edirlər.

Psixoloq tövsiyə edir ki, qida gündəliyi aparılsın və orada aclıq hissinin səbəbi, məsələn, narahatlıq və ya həyəcan qeyd edilsin. Daha sonra bu qeydlər təhlil olunaraq müəyyən qanunauyğunluqlar müəyyən edilə bilər.

“Gərginlik zamanı şüurlu şəkildə yeməkdən uzaq durmağa çalışın. Diqqətinizi yayındırın, yemək əvəzinə gəzintiyə çıxın, kitab oxuyun və ya nəfəs alma texnikaları tətbiq edin. Stresi yeməklə deyil, idmanla, yaradıcılıqla, yoqa ilə əvəz edin. Narahatlıq hiss etdiyiniz an bir stəkan su için”, – deyə Korolyova əlavə edib.

Ulusum.az

Diqqət Çəkənlər