Ağsuda həyat yoldaşına zəng edən uşaqlıq dostunu bıçaqladı – TƏFƏRRÜAT

Ağsu rayonunda 30 yaşlı kişi arvadına zəng edən həmyerlisi və uşaqlıq dostunu bıçaqlayıb.

Ötən il yanvarın 7-də Ağsu rayonunda Fəqan adlı şəxs dostu Sərxanı bıçaqlayıb.


Ulusum.az xəbər verir ki, hadisəyə səbəb Fəqanın həyat yoldaşının telefonuna Sərxanın zəng etməsi olub. Fəqan bunu şübhəli sayaraq məsələni aydınlaşdırmaq üçün Sərxanla görüşmək qərarına gəlib.

Onlar gecə saatlarında kənd ərazisində görüşüblər. Sərxan zəngin səhvən edildiyini və nömrəni Fəqanın adına yaddaşda saxladığını izah etsə də, Fəqan buna inanmayıb. Mübahisə zamanı qısqanclıq və emosional gərginlik nəticəsində Fəqan Sərxanı bıçaqla sinəsindən yaralayıb.

Sərxan xəstəxanaya aparılıb və həyatını xilas etmək mümkün olub. Fəqan isə hadisədən sonra polisə özü zəng edib.

Şəki Ağır Cinayətlər Məhkəməsinin hökmü ilə təqsirləndirilən şəxsin barəsində Cinayət Məcəlləsinin 70-ci (şərti məhkum etmə) maddəsi tətbiq olunub.

Ona 2 il sınaq müddəti olmaqla 3 il şərti cəza verilib.