"Kök kişilər üçün iynə" – Trampın tənqid etdiyi “Ozempik” həqiqətən işləyirmi?

ABŞ-ın sabiq prezidenti Donald Tramp Fox News telekanalına verdiyi müsahibədə şəkərli diabetin müalicəsində istifadə olunan və arıqlamaq üçün də populyarlaşan “Ozempik” preparatının effektiv olmadığını düşündüyünü bildirib.

Tramp, “çox ağıllı və çox varlı” bir dostundan danışaraq, onun artıq çəkidən əziyyət çəkdiyini və “Ozempik”ə bənzər bir preparatı Londonda, ABŞ-la müqayisədə 15 dəfə ucuz qiymətə aldığını deyib.

“Dostum Londonda nəsə alırdı, yəqin ki, Ozempik idi. Mən onu ‘kök kişilər üçün iynə’ adlandırıram. Açığı, bu dərmanın işlədiyinə inanmıram. Amma heç olmasa, onun üçün psixoloji olaraq rahatlıq verir,” – deyə Tramp bildirib.

Söhbət zamanı Tramp öz çəki problemi ilə də bağlı fikirlərini bölüşüb. 2022-ci ilin yazında verdiyi bir müsahibədə siyasətçi əlavə edib ki, məşhur amerikalı həkim və televiziya aparıcısı Mehmet Oz ona arıqlamağı tövsiyə edib.

“Doktor Oz dedi ki, mənim sağlamlığım mükəmməldir. Bu, ona sevgimi daha da artırdı. Amma eyni zamanda dedi ki, bir neçə kilo arıqlamağım pis olmazdı,” – deyə Tramp zarafatla qeyd edib.

Tramp bildirib ki, təxminən 100 kiloqram çəkisi var, lakin arıqlamaq üçün vaxt tapa bilmədiyini etiraf edib.

✍️"Ulusum".az