Mətbəxdə Möcüzə Yarandımı? Bəli, Bizim Süd Çörəyimiz Sayəsində!

Səhərin ilk işıqlarıyla sobadan gələn isti çörək qoxusu evin hər küncünü sarır... Südün yumşaqlığı və unun saflığı ilə yoğrulan bu çörək nəinki mədəniyyətimizin, həm də uşaqlıq xatirələrimizin ayrılmaz bir hissəsidir. Hər dilimi nostalji, hər loxması rahatlıq gətirən süd çörəyi həm doyurucu, həm də ruhu oxşayan bir dad təqdim edir.

Tərkibi:

- 1 stəkan (200 qramlıq) ilıq süd
- ½ xörək qaşığı quru maya
- 1 ədəd yumurta
- 1 stəkan şəkər tozu
- 80 qram yumuşalmış kərə yağı (istəyə görə marqarin və ya duru yağla əvəz edilə bilər)
- Azca sarıkök (təxminən yarım çay qaşığından az)
- Vanilin, duz – zövqə görə
- 4 stəkan (təxminən 500 qram) ələnmiş un
- 2 xörək qaşığı duru yağ (yoğurma mərhələsində)

Hazırlanması:

1. Südü bir qaba töküb içinə maya, yumurta, şəkər tozu, yumuşalmış yağ, sarıkök, vanil və duz əlavə edin. Yaxşıca qarışdırın.
2. Daha sonra ələnmiş unu hissə-hissə əlavə edərək qarışdırın. Xəmir əllə yoğurula biləcək vəziyyətə gələndə, duru yağı əlavə edib 3-5 dəqiqə yaxşı yoğurun. Yumşaq və elastik bir xəmir alınmalıdır.
3. Hazırladığınız xəmiri isti bir yerə qoyun, üzərini örtərək təxminən 1 saat acımağa qoyun.
4. Xəmir qalxdıqdan sonra yağlanmış soba sinisinə yayın və üzərini örtüb yenidən 1 saat acımağa qoyun.
5. Ayrı bir qabda yumurta sarısı ilə 1 xörək qaşığı südü qarışdırın və xəmirin üzərinə çəkin. 7-8 yerdən çəngəlləyin, istəyə görə bəzək verin.
6. Üzərinə küncüt və ya çörək otu səpərək əvvəlcədən 200°C-də qızdırılmış sobada 35–40 dəqiqə bişirin.

Nuş olsun!

✍"Ulusum".az