Müalicəyə tabe olmayan qan laxtalanma pozuntusu aşkar edilib

MakMaster Universitetinin alimləri standart müalicəyə tabe olmayan yeni qan laxtalanma pozuntusunu aşkar ediblər. Xəstəlik VITT-ə bənzər monoklonal qammopatiya trombotik sindromu (MGTS) adlandırılıb.

MGTS, COVID-19 peyvəndləri ilə əlaqələndirilən nadir, lakin təhlükəli qan laxtalanma pozuntusu olan VITT-ə bənzəsə də, onun əksinə, məlum səbəb olmadan inkişaf edir. Bu xəstəlikdə orqanizmdə VITT-ə bənzər antitellər yaranır, bu da standart müalicəyə davamlı trombların formalaşmasına səbəb olur.

Alimlər beş ölkədən (Kanada, Yeni Zelandiya, Fransa, İspaniya və Almaniya) olan xəstələri araşdıraraq, onların qanında PF4 zülalına hücum edən monoklonal antitellərin 12 ay ərzində qaldığını aşkar ediblər.

Adi antikoaqulyantlar MGTS xəstələrində effekt verməsə də, yüksək dozalı venadaxili immunoqlobulin (IVIG), Bruton tirozin kinaz inhibitorları (ibrutinib) və mieloma müalicəsində istifadə olunan bəzi üsullar müsbət nəticə verə bilər.