“Bananı da yumaq lazımdır!” – Ekspert

Bunu britaniyalı qida texnoloqu Tamika Sims Mirror qəzetinə müsahibəsində bildirib. Onun sözlərinə görə, banan, portağal və s. kimi qabıqlı meyvələr belə axar su ilə yuyulmalıdır. Çünki üzərindəki toz, bakteriya və pestisid qalıqları meyvəni soyarkən əlləriniz vasitəsilə orqanizmə daxil olur.



Ekspert bildirir ki, bu qaydaya əməl etməmək salmonella, koli bakteriyası və listeriya kimi təhlükəli mikrobların səbəb olduğu qida zəhərlənmələrinə yol aça bilər. Bu xəstəliklər xüsusilə uşaqlar, yaşlılar və immun sistemi zəif olan insanlar üçün təhlükəlidir. Bəzən vəziyyət o qədər ağır olur ki, xəstəxanaya yerləşdirilmək lazım gəlir.

Tamika Sims əlavə edib ki, yuyulmamış meyvələrin üzərində kir, zibil, hətta həşərat qalıqları da ola bilər. Pestisidlər isə xərçəng, autizm, şəkərli diabet, hipertoniya və demensiya kimi ağır xəstəliklərlə əlaqələndirilir.

Ulusum.az