«Pokerface» yeniyetmələrdə: dəb, yoxsa gizli kömək çağırışı?

On il əvvəl ailə albomları təbii təbəssüm, mimika və səmimi emosiyalarla dolu idi. Bu gün isə getdikcə daha çox yeniyetmə və hətta məktəblilər şəkil çəkdirərkən üzlərini daş kimi soyuq saxlayırlar – nə sevinc, nə təəccüb, nə də maraq ifadəsi var. Sosial şəbəkələrdə bu halı «pokerface» və ya «şüşə baxış» adlandırırlar. Valideynlər üçün bu ifadə narahatedici görünə bilər, amma arxasında təkcə dəb deyil, həm də bir sıra psixoloji səbəblər dayanır.

🔹 Niyə yeniyetmələr «pokerface» seçirlər?

Özünümüdafiə – emosiyaları gizlətməklə başqalarının məsxərəsinə qalmaqdan qaçırlar.

Sosial media obrazı – soyuq mimika güc və statusla assosiasiya olunur.

Dəbə uyğunlaşma – neytrallıq bir estetik üslub kimi qəbul edilir.

🔹 Valideynlər nə edə bilərlər?

Dəbi qəbul edin, amma norma saymayın.
Qadağalar uşağın müqavimətinə səbəb ola bilər. Daha yaxşısı, onunla söhbət edib emosiyaların real həyatda vacibliyini izah edin.

Təhlükəli siqnallara diqqət edin.

Əgər «pokerface» qapalılıq, apatiya və hobbilərə marağın itməsi ilə müşayiət olunursa, bu, artıq sadəcə dəb deyil. Uşağın hisslərini soruşmaq, lazım gəldikdə psixoloqa müraciət etmək vacibdir.

Şəxsi nümunə göstərin.

Valideynlər özləri açıq şəkildə sevinəndə, kədərlənəndə, təəccüblənəndə övlad görür ki, emosiyalar normaldır.

Emosional intellekti oyunla inkişaf etdirin.

Aktor məşqləri, stolüstü oyunlar, filmlərin müzakirəsi uşağa mimikanın ünsiyyət vasitəsi olduğunu öyrədir. Məsələn, «Timsah» oyunu daxili gərginliyi azaldır və empatiyanı artırır.

Xarici görünüşünə görə utandırmayın.

«Gül də görüm», «bu nə qaşqabaqdır?» kimi sözlər tənqid kimi qəbul olunur. Daha yaxşısı, bir fotonu onun sevimli ifadəsi ilə, digərini isə təbəssümlə çəkməyi xahiş edin. Bu, uşağın seçimlərinə hörmət göstərildiyini hiss etdirir.

Ulusum.az