Ofis pişiyinə dayəlik: Britaniya şirkəti saatına 100 funt maaş təklif edir

Britaniyanın mərkəzində yerləşən və aviasiya ticarəti üzrə ixtisaslaşmış “Aviamarket” şirkəti ofis pişiyi Cerri üçün dayə axtarır. Bu barədə “BBC” yazır.

İş üçün təklif olunan əməkhaqqı saatına 100 funt sterlinqə qədərdir ki, bu da çoxsaylı namizədlərin marağına səbəb olub.

Cerri — britaniya qısa tüklü pişiyidir və artıq uzun müddətdir ki, ofis həyatının ayrılmaz hissəsinə çevrilib. Şirkət onun həssas və diqqət tələb edən bir heyvan olduğunu bildirir. Dayənin vəzifələrinə pişiyi mütəmadi qidalandırmaq, tüklərinə qulluq etmək, rahat mühit yaratmaq və cümə günləri klassik musiqi səsləndirmək daxildir. Həmçinin, ayda bir dəfə lüks mağazalara aparılaraq ona yeni oyuncaqlar alınmalıdır.

İş qrafiki həftədə 8-dən 40 saata qədər dəyişə bilər. Namizədlər heyvanlara qulluq sahəsində təcrübəli, səliqəli və məsuliyyətli olmalıdırlar. Şirkətin qurucusu Viktor Martınovun sözlərinə görə, əvvəlcə sıx iş qrafikinə görə Cerri ilə ofisə gəlməyə başlayıb, lakin sonradan pişiyin işçilərin əhval-ruhiyyəsinə müsbət təsir etdiyini görüb.

Cerri sadəcə ev heyvanı deyil, artıq iş prosesinin tamhüquqlu iştirakçısına çevrilib. İşçilər hətta iş gününə başlamazdan əvvəl ona toxunaraq uğur diləməyi adətə çeviriblər. Bir dəfə Cerri danışıqlar zamanı müştərinin dizinə çıxaraq böyük müqavilənin bağlanmasına da “yardımçı” olub.

Ulusum.az