Pekində tarixi qaçış: İnsanlar və robotlar yan-yana yarımmarafonda

Çinin paytaxtı Pekində unikal idman yarışı keçirilib — yarımmarafon məsafəsində insanlar və insanabənzər robotlar birlikdə qaçıblar.

Bu barədə Sina xəbər yayıb.

Ümumilikdə yarışda 12 min insan və müxtəlif ölçü və funksionallığa malik 20-dən çox insanabənzər robot iştirak edib.

Bəzi modellər diqqətçəkən göstəricilərlə fərqlənib. Məsələn, Tiangong Ultra komandasının robotu saatda 12 km sürətlə hərəkət edə bilir və bu göstərici ilə insanabənzər robotlar arasında dünya rekordçusudur. Həmçinin, bu robot yamac, dərələr və pilləkənlər də daxil olmaqla müxtəlif səthlərdə sərbəst hərəkət edə bilir.

Digər iştirakçılardan biri olan Songyan Power N2 isə yüksək dayanıqlığı və addım ritmini dinamik tənzimləmə qabiliyyəti ilə seçilir. Bu sayədə o, qeyri-bərabər səthlərdə də tarazlığı itirmədən hərəkət edə bilir.

Yarışa qatılan robotlar arasında həm 120 sm hündürlüyündə və 30 kq çəkidə kiçik modellər, həm də 180 sm boyunda, 52 kq çəkidə tamölçülü insanabənzər versiyalar yer alıb.