Final həyəcanı: Üç güləşçimiz Avropanın zirvəsində!

İtaliyanın Kaorle şəhərində U-20 Avropa çempionatı start götürdü!

İlk yarış günündə yunan-Roma güləşi üzrə 5 çəkidə finalçılar bəlli oldu və bizim güləşçilərimiz parlaq nəticələrlə finala yüksəldilər!

Turan Daşdəmirov (55 kq) möhtəşəm çıxışla Gürcüstan, Ermənistan və Ukrayna təmsilçilərinə qalib gələrək finala yüksəldi! Finalda rusiyalı İvan Solominlə üz-üzə gələcək.

Tural Əhmədov (63 kq) isə italiyalı, bolqarıstanlı, macarıstanlı və yunanıstanlı rəqiblərini məğlub edərək finalda yerini təmin etdi. Turalın rəqibi rusiyalı İqor Punçenko olacaq.

Davud Məmmədov (77 kq) Moldovadan, Türkiyədən və Ermənistandan olan rəqiblərini məğlub edib finala yüksəldi və Gürcüstan təmsilçisi Anri Putkaradzeylə qızıl medal uğrunda gücünü sınayacaq.

Debütantlarımız Orxan Hacıyev (87 kq) və Məzaim Mərdanov (130 kq) də öz güclərini göstərdilər, amma finala yüksəlmək şanslarını itirdilər.

Bugün isə ən həyəcanlı anlar – final görüşləri keçiriləcək! Hamımız güləşçilərimizə inanırıq və dəstəkləyirik!

Ulusum.az