Şamaxıda kütləvi zəhərlənmə baş verib

Şamaxıda kütləvi zəhərlənmə baş verib. Zəhərlənməyə səbəb qonaqlara verilən tort olub. Hadisə rayonun Məlikçobanlı kəndində qeydə alınıb. İlkin məlumata görə, məclisdə iştirak edən 21 nəfər kəskin zəhərlənmə diaqnozu ilə rayon mərkəzi xəstəxanasına çatdırılıb. 10-a yaxın sakin təcili tibbi yardım avtomobili ilə aparılıb, digərləri isə xəstəxanaya özləri müraciət edib. Hazırda vəziyyətlərinin normal olduğu bildirilir. Məlikçobanlı kənd icra nümayəndəsi Sənan Abdullayevin verdiyi məlumata əsasən, Ukraynanın Xarkov şəhərindən kəndə qonaq gələn ailə üçün evdə yığıncaq təşkil edilib. Qonaqlar üçün hazırlanan tort zəhərlənməyə səbəb olub.
Şamaxı Rayon Mərkəzi Xəstəxanasından bildirilib ki, artıq bütün xəstələrə ilkin tibbi yardım göstərilib və onların hamısı evə buraxılıb.
Zərərçəkənlərdən beşinin azyaşlı olduğu bildirilir, onlardan ən kiçiyinin 1, ən böyüyünün 8 yaşı var.
Faktla bağlı araşdırma aparılır.

Eltun Məmmədov