Attraksion havaya qalxdı, uşaqlar yerə çırpıldı

Cənubi Afrikada iki uşaq şişirdilmiş tullanma qalasından 12 metr hündürlükdən yıxılıb. Bu barədə Daily Mail məlumat yayıb.

Hadisə Krüqersdorp şəhərində yerləşən Laerskool Protearif ibtidai məktəbində xeyriyyə tədbiri zamanı baş verib. Güclü külək səbəbindən yerə möhkəmləndirilməmiş attraksion havaya qalxıb. Həmin anda onun içində uşaqlar olub.

Onlardan biri havaya qalxmış qalada tarazlığı itirib və yerə çırpılıb. Ardınca ikinci uşaq da yıxılıb. Hadisə şahidləri yerə düşməni yüngülləşdirməyə çalışsalar da, hər iki uşaq ciddi xəsarət alıb. Onlar dərhal xəstəxanaya çatdırılıb. Birinə kəllə sümüyündə çat diaqnozu qoyulub, digəri isə qolunu sındırıb. Uşaqlardan biri elə həmin gün evə buraxılıb, digəri isə üç gün xəstəxanada qalıb. Məktəb rəhbərliyi bildirib ki, uşaqlara psixoloji yardım göstərilir və hadisə ilə bağlı araşdırma aparılır.

Ulusum.az