Kiberməkanda cinayətkarlıq 15% artacaq

Kibercinayətkarlıq sərhədsizdir. Son hesablamalara görə, növbəti beş il ərzində kibercinayətkarlığın dünya ölkələrinə vurduğu zərər 15 faiz artaraq 2025-ci ilə qədər təqribən 10,5 trilyon dollara çatacaq.
Ulusum.az xəbər verir ki, bu barədə DİN Mətbuat Xidmətinin rəisi Elşad Hacıyev məlumat verib.
Onun sözlərinə əsasən, kiber məkanda hər şey sualdır.

"Kiber təhlükədən qaçış, sıfır etibar “heç vaxt etibar etmə, həmişə yoxla” prinsipi geridə qalıb. Buna mütəxəssislərin əlavəsi var. İnsan internetdə “heç vaxt etibar etmə, həmişə yoxla və yenidən yoxla" prinsipinə uyğun davranmalıdır, əks halda cinayətkarlığın qurbanı olacaqdır. Sıfır etibar arxitekturasını tətbiq edərkən, şəbəkənizə daxil olan — zəng edən, mesaj yazan, link göndərən, investisiya təklif edən, ucuz məhsul satan, qazanc vəd edən, iş təklif edən, valyuta dəyişən, beh verən hər bir istifadəçinin şəxsiyyəti yoxlanılmalıdır", - deyə Elşad Hacıyev vurğulayıb.

Qeyd edək ki, hazırki şəraitdə kiberməkan cinayətkarlığı internet dünyasında mövcud olub hər hansı mənfəət, məlumat əldə etmək, şantaj etmək və ya digər məqsədlər üçün istifadə olunur. Bu təhlükə əsasən, məxfi məlumatların, bank hesablarının, şəxsi məlumatların və hətta infrastrukturun təhdid altında olmasına səbəb ola bilər.

Kiberməkan cinayətkarlığın qurbanına çevrilməmək üçün şifrələrin təhlükəsizliyi, antivirüs proqramları və faydalı istifadəçi təlimatları kimi tədbirlərə önəm verilməlidir.

Aymirə Ağamirova