Heydər Əliyev Vaşinqtonda YAD EDİLDİ - FOTO - EKSKLÜZİV

ABŞ-ın paytaxtı Vaşinqtonda Ümummilli Lider Heydər Əliyevin doğum gününə həsr olunan tədbir keçirilib.

Ulusum.az saytının ABŞ Bürosu xəbər verir ki, ABŞ-dakı Azərbaycan Respublikasının Səfirliyində Ulu Öndər Heydər Əliyevin anadan olmasının 101-ci ildönümü ilə bağlı təşkil olunan tədbirdə Azərbaycanın ABŞ-dakı fövqəladə və səlahiyyətli səfiri Xəzər İbrahim, ölkəmizin ABŞ-da hərbi attaşesi Rüstəm Gözəlov və ABŞ-də yaşayan Azərbaycan diasporunun nümayəndələri və diplomatlar iştirak edib.

Ümumilli liderin xatirəsi bir dəqiqəlik sükutla yad edilib.

Səfir Xəzər İbrahim açılış nitqi ilə çıxış edərək Azərbaycan tarixinin son dərəcə mürəkkəb dövrlərində Heydər Əliyevin keçdiyi çətin və keşməkeşli həyat yolundan, apardığı mübarizələrdən danışıb.
"Ümummilli lider Heydər Əliyev hər kəsə nümunə olan ölməz şəxsiyyətdir. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin Ulu Öndərin anadan olduğu gündə ölkəmizin Şuşa şəhəri və Qarabağ regionuna səfər edib, layiqli siyasi rəhbərliyi ilə ölkəmizin istər daxili, istərsə də xarici siyasətdə əldə etdiyi hər bir uğurunda Heydər Əliyev zəkasının təcəssümü, onun əmanət qoyduğu milli tərəqqi ideyalarının qələbəsi əks olunub".

Səfir həmçinin, bu il Heydər Əliyev Fondunun yaranmasının 20 illiyinin qeyd olunduğunu bildirərək, fəaliyyəti dövründə Fond tərəfindən hər zaman gənclərimizin təhsil almasına və beynəlxalq müsabiqələrdə iştirakına dəstək olunduğunu vurğulayıb.

Tədbirdə çıxış edən hərbi attaşe Rüstəm Gözəlov Ümummilli Liderin ölkəmizin ordu quruculuğunda müstəsna xidmətlərini vurğulayıb.

Tədbirin rəsmi hissəsinin yekununda Azərbaycan Respublikasının Xarici İşlər Nazirliyi tərəfindən hazırlanmış Ümummilli Lider Heydər Əliyevin xarici siyasətə dair fəaliyyətini əks etdirən video çarx nümayiş etdirilib.

Ümummilli Lider Heydər Əliyevin ABŞ-a rəsmi və işgüzar səfərlərini əks etdirən foto-sərgi qonaqların marağına səbəb olub.

MÜNƏVVƏR VAHABOVA
ABŞ Bürosu - Vaşinqton.