Sahibə Qafarova Venesuela Parlament nümayəndəsi ilə görüşüb

Milli Məclisin sədri Sahibə Qafarova Venesuela Milli Assambleyasının sədrinin müavini, Venesuela-Azərbaycan parlamentlərarası əlaqələr üzrə dostluq qrupunun rəhbəri Amerika Valentina Peres Davila ilə görüşüb.

Görüşdə iki ölkə arasında diplomatik əlaqələrin 30 illiyinin qeyd edilməsi və əlaqələrin daha da dərinləşdirilməsi üçün imkanların olduğu vurğulanıb.

Həmçinin qarşılıqlı səfərlərin və ali səviyyəli görüşlərin əhəmiyyəti qeyd edilib. Azərbaycanın Qoşulmama Hərəkatında sədrliyi dövründə ölkənin irəli sürdüyü təşəbbüslərin Venesuela tərəfindən dəstəkləndiyi bildirilib.

Həmçinin, ölkələr arasında beynəlxalq təşkilatlar çərçivəsində əməkdaşlıq və qarşılıqlı dəstək ifadə edilib.

Sahibə Qafarova Qoşulmama Hərəkatının Parlament Şəbəkəsinin inkişafı barədə məlumat verib. Venesuela nümayəndəsi Parlament Şəbəkəsinin işində fəal iştirak etdiklərini qeyd edib.

Görüşdə qlobal iqlim dəyişiklikləri və inkişaf etməkdə olan ölkələrə təsirləri müzakirə olunub. Qonaq Azərbaycanın COP29 tədbirinə ev sahibliyi ilə bağlı təbriklərini çatdırıb. Görüşdə, həmçinin Azərbaycanın işğaldan azad olunmuş torpaqları və məcburi köçkünlərin qayıdışı barədə də məlumat verilib.

Venesuela Milli Assambleyasının sədr müavini, Venesuela-Azərbaycan Dostluq qrupunun rəhbəri Amerika Perez, həmçinin Bakıda Zəfər parkını ziyarət edib.

Qonaq, parkdakı Zəfər abidəsinin önünə gül dəstələri qoyub və burada Azərbaycan xalqının Vətən müharibəsindəki qəhrəmanlığını əks etdirən Zəfər parkı haqqında ətraflı məlumat alıb. Parkın girişində 44 günlük müharibənin rəmzi olaraq Zəfər tağı inşa edilib.