WSJ: Tramp, inauqurasiyadan dərhal sonra miqrantların ölkədən çıxarılmasına başlayacaq

ABŞ-ın seçilmiş prezidenti Donald Tramp, inauqurasiyadan bir gün sonra miqrantların ölkədən çıxarılmasına başlayacaq.

“Ulusum”.az xəbər verir ki, bu barədə The Wall Street Journal məlumat yayıb.

Bildirilir ki, genişmiqyaslı reydlər ilk olaraq İllinoys ştatının Çikaqo şəhərindən başlayacaq. ABŞ Miqrasiya və Gömrük Mühafizəsi Xidmətinin təxminən 200 əməkdaşı çərşənbə axşamından həftənin sonuna qədər davam edəcək əməliyyatlarda iştirak edəcək.

Əsas hədəf kriminal keçmişi olan qeyri-leqal miqrantlar olacaq. Çikaqodan sonra reydlər Nyu-York, Los-Anceles (Kaliforniya ştatı), Denver (Kolorado ştatı) və Mayami (Florida ştatı) şəhərlərində davam edəcək və daha sonra ABŞ-ın digər böyük şəhərlərində geniş miqrant diasporlarının olduğu yerləri əhatə edəcək.

Tramp, miqrantların (ən azı bir neçə milyon insanın) ölkədən çıxarılması əməliyyatlarına başlamaq üçün Konqresin qeyri-leqal miqrasiyaya dair qərarlarını aşmaq məcburiyyətində qalacaq.

Səidə Mustafa