Fransa Xarici İşlər Naziri Barro: Avropa İttifaqı Qrenlandiyanı müdafiə edəcək

Fransanın Xarici İşlər Naziri Jan-Noel Barro bəyan edib ki, Avropa İttifaqı öz suveren sərhədlərinə hər hansı bir dövlətin hücum etməsinə imkan verməyəcək. O, bu sözləri "France Inter" radiosuna müsahibəsində bildirib.

Barro qeyd edib ki, ABŞ Qrenlandiyanı ələ keçirə bilməyəcək, lakin dünya “güc qanununun yenidən qüvvəyə mindiyi” bir dövrə daxil olub. Bununla belə, diplomat vurğulayıb ki, ABŞ öz təbiətinə görə daha imperialist bir dövlətə çevrilmir, baxmayaraq ki, onun liderinin bəyanatları bəzən bu istiqamətdə qəbul edilir.

Qeyd edək ki, 2025-ci il yanvarın 7-də ABŞ-ın seçilmiş lideri Donald Tramp, Qrenlandiyanın ABŞ-ın bir hissəsi olması lazım olduğunu bəyan edib. Onun fikrincə, bu ada strateji baxımdan milli təhlükəsizlik və "azad dünyanı", o cümlədən Çindən və Rusiyadan qorumaq üçün əhəmiyyətlidir.

Amerika liderinin bu sözlərini şərh edən Danimarka hökumətinin başçısı Mette Frederiksen bildirib ki, Qrenlandiya satıla bilməz. O vurğulayıb ki, bu ada Qrenlandiyalılara məxsusdur və onun gələcəyini yalnız onlar müəyyən edəcək.

Səidə Mustafa