NYT: Seçkilərdə qələbə qazandıqdan sonra Tramp 200 milyon dollardan çox ianə toplayıb

ABŞ-ın keçmiş prezidenti Donald Tramp, 2024-cü il prezident seçkilərində qələbə qazandıqdan sonra müxtəlif mənbələrdən 200 milyon dollardan çox ianə alıb. Bu barədə "The New York Times" xəbər verir. Sözügedən vəsait onun kampaniyasının maliyyələşdirilməsi və gələcək siyasi fəaliyyətləri üçün istifadə edilə bilər.

Nəşrin məlumatına görə, toplanan vəsaitlər Trampın inaqurasiya mərasimini təşkil etmək və keçirmək, siyasi tədbirlərin maliyyələşdirilməsi və potensial olaraq prezident kitabxanasının yaradılması üçün istifadə ediləcək.

Trampa dəstək verən donorlar arasında Pfizer, Amazon və OpenAI kimi iri korporasiyalar, həmçinin kriptovalyutalarla əlaqəli şirkətlər də yer alır.

Trampın inaqurasiya təşkilat komitəsi sponsorlardan ən azı 150 milyon dollar alıb və bu məbləğin yaxın həftələrdə daha da artması gözlənilir. Bu, Trampın 2017-ci ildə inaqurasiya üçün 107 milyon dollar topladığı əvvəlki rekordunu əhəmiyyətli dərəcədə üstələyir.

İnaugurasiya xərclərindən əlavə, Tramp tərəfindən yaradılan digər komitələr də donorlar tərəfindən vəsait alır. Bu vəsaitlər, xüsusilə, Trampa sadiq olan siyasətçilərin dəstəklənməsi və onların seçki kampaniyalarının maliyyələşdirilməsi üçün istifadə ediləcək.