Sudanda Müvəqqəti Hökumət Buraxıldı – Yeni Kabinet Yolda

Sudanın Baş naziri Kamal İdris müvəqqəti hökuməti buraxdı. Bu barədə Sudan Dövlət İnformasiya Agentliyi (SUNA) məlumat yayıb.

"Müvəqqəti hökumətin başçısı Kamal İdris nazirlər kabinetinin buraxılması barədə qərarını hökumət üzvlərinə çatdırıb və yeni hökumət formalaşana qədər vəzifələri müvəqqəti olaraq nazir müavinlərinə və baş katiblərə həvalə edib", – deyə məlumatda qeyd olunub.

Qeyd edək ki, 20 may tarixində Sudan Silahlı Qüvvələri paytaxt Xartum əyalətinin Sürətli Reaksiya Qüvvələrinin (SRQ) silahlılarından tam azad edildiyini açıqlayıb.

2023-cü ilin aprelindən etibarən Sudanda ordu ilə SRQ arasında qarşıdurmalar davam edir. Qüvvələrə Məhəmməd Həmdan Dağlo rəhbərlik edir. Beynəlxalq Qırmızı Xaç Komitəsi xəbərdarlıq etmişdi ki, uzunmüddətli münaqişə ölkədə xəstəliklərin yayılmasına və səhiyyə sisteminin tam çökməsinə səbəb ola bilər. Sudanın Rusiyadakı səfiri Məhəmməd Sirac isə yanvarda ümid etdiyini bildirmişdi ki, qarşıdurma 2025-ci ilə qədər həllini tapacaq.

Ulusum.az