ABŞ Prezidentinin milli təhlükəsizlik üzrə müşaviri Mayk Uolts istefa verdi

Fox News-un yaydığı məlumata görə, ABŞ prezidentinin milli təhlükəsizlik üzrə müşaviri Mayk Uolts və onun müavini Aleks Vonq tutduqları vəzifədən istefa veriblər. Onların bu cümə axşamı vəzifələrini tərk etməsi gözlənilirdi. Hazırda Ağ Evdən məsələ ilə bağlı heç bir rəsmi şərh verilməyib.

Mart ayında Uolts böyük bir qalmaqalın mərkəzinə düşmüşdü. O, The Atlantic nəşrinin baş redaktoru Ceffri Qoldberqi məsafədən Pentaqonun husilərə (Yəməndəki yaraqlılar) qarşı hava zərbələri planı barədə aparılan gizli söhbətə təsadüfən əlavə etmişdi. Məlumat yayılaraq ictimailəşəndən sonra Uoltsun istefası məsələsi gündəmə gəlmişdi.

Sonradan aydın olub ki, müşavir jurnalisti səhvən söhbətə daxil edib – onun telefonunda Qoldberqin əlaqə məlumatları başqa bir şəxsin adı altında qeyd olunmuşdu. The Guardian bu şəxsin Ağ Evin Milli Təhlükəsizlik Şurasının mətbuat katibi Brayan Hyuz olduğunu ehtimal edib.

✍️"Ulusum".az