Tramp ailəsindən Pasxa sevinci: Ağ Evdə ənənəvi yumurta bayramı

ABŞ prezidenti Donald Tramp və həyat yoldaşı Melaniya bu bazar ertəsi Ağ Evin çəmənliyində uşaqlar üçün ənənəvi Pasxa yumurtası yuvarlama mərasimi təşkil ediblər.

"Biz dini Amerikaya geri qaytarırıq," – deyə Tramp Ağ Evin eyvanından tədbirə toplaşan qonaqlara müraciətində bildirib. O, Pasxa bayramının amerikalılar üçün çox xüsusi və sevilən günlərdən biri olduğunu vurğulayıb.

Daha sonra Tramp və Melaniya çəmənliyə enərək qızılı fitlərlə bayrama rəsmi start veriblər. Fit səsləri ilə uşaqlara siqnal verilib və onlar xüsusi taxta qaşıqlarla rəngli yumurtaları yuvarlamağa başlayıblar.

Tədbir zamanı Tramp çox sayda uşaq və valideynlərlə şəkil çəkdirib və jurnalistlərlə söhbət edib. Tədbirdə Trampın oğlu Donald Tramp Jr və onun sevgilisi Bettina Anderson da iştirak ediblər.

Bu ilki yumurta bayramının mövzusu ABŞ-ın yaxınlaşan 250 illik yubileyi olub. Uşaqlar Trampla birlikdə Müstəqillik Bəyannaməsinin mini versiyalarını imzalayıblar, bəziləri isə ABŞ-ın banilərini təqlid edən geyimlərdə iştirak ediblər.

Tədbir üçün təxminən 30 min ədəd əl ilə boyanmış yumurta hazırlanıb və onlar cümə günü Ağ Evə gətirilib. Keçən il bu rəqəm 64 min idi.

Gözlənilir ki, ümumilikdə bu gün ərzində Ağ Evi təxminən 42 min qonaq, əsasən uşaqlar ziyarət edəcək. Bu Pasxa mərasimi 1878-ci ildən bəri ənənəvi olaraq keçirilir.