Brüsseldən Putinə soyuq cavab: Real atəşkəs olsa, görərik

Avropa Komissiyasının (AK) mətbuat katibi Anitta Xipper Rusiya Prezidenti Vladimir Putinin elan etdiyi pasxa atəşkəsi ilə bağlı ehtiyatlı mövqe sərgiləyib.

“Ulusum”.az xəbər verir ki, bu barədə Reuters məlumat yayıb.

“Rusiyanın aqressor kimi təcrübəsi var. Ona görə də biz ilk növbədə real hərbi əməliyyatların dayandırılmasını və uzunmüddətli atəşkəs üçün konkret addımları görməliyik,” – deyə Xipper bildirib.

O əlavə edib ki, Ukrayna qeyd-şərtsiz atəşkəsi qəbul etdiyini artıq bir aydan çoxdur elan edib və vurğulayıb ki, Rusiya istəsəydi, istənilən an döyüşləri dayandıra bilərdi.

“Biz Ukraynanın uzunmüddətli, ədalətli və hərtərəfli sülhə nail olmaq istəyini dəstəkləməyə davam edirik,” – deyə AK nümayəndəsi vurğulayıb.

Qeyd edək ki, 19 aprel tarixində Rusiya Prezidenti Vladimir Putin Baş Qərargah rəisi Valeri Gerasimovla görüşündə pasxa atəşkəsi elan edib. Onun sözlərinə görə, bu qərar “humanitar baxımdan” verilib. Döyüş əməliyyatları 19 aprel saat 18:00-dan 21 aprel gecə yarısına qədər dayandırılıb. Putin əlavə edib ki, Rusiya tərəfi Ukraynanın da atəşkəs elan edəcəyini gözləyir, lakin Rusiya Silahlı Qüvvələri istənilən hücum və təxribatlara hazır olmalıdır.