Avroviziya 2025: Mahnılar Səslənir, Etirazlar Susmur

2025 Avroviziya Mahnı Müsabiqəsi bu il İsveçrənin Bazel şəhərində keçirilsə də, tədbir musiqidən çox siyasətin kölgəsində qalır. İsrailin iştirakı, Qəzza zolağındakı müharibə fonunda həm Avropada, həm də beynəlxalq ictimaiyyətdə kəskin etirazlara yol açıb.

Açılış mərasimində yüzlərlə insan Fələstin bayraqları ilə küçələrə çıxaraq İsrailin müsabiqədə iştirakına qarşı səsini ucaldıb. Etirazların əsas hədəfində isə İsrail nümayəndə heyəti və ölkəni təmsil edən ifaçı Yuval Rafael olub.

Yuval Rafael – 7 oktyabr hücumundan sağ çıxmış bir şəxs – "Yeni gün yüksələcək" adlı mahnı ilə səhnəyə çıxaraq emosional bir mesaj verməyə çalışır. Onun çıxışı sosial mediada həm dəstək, həm də sərt tənqidlə qarşılanıb.

Bazel şəhər rəhbərliyi təhlükəsizlik məsələsini prioritet elan edərək 1300-dən çox polis əməkdaşı və əlavə hərbi qüvvələri səfərbər edib. Şəhərdə nəzarət gücləndirilib, tədbirin keçirildiyi ərazilərdə ciddi yoxlamalar aparılır.

Bütün bu hadisələr Avroviziyanın illərdir qorumağa çalışdığı "siyasi neytrallıq" prinsipinə dair yeni suallar doğurur. Bir tərəfdə musiqi və mədəniyyət bayramı, digər tərəfdə isə davam edən müharibə və insan haqları narahatlıqları... Avroviziya bu il təkcə səslə deyil, səssiz etirazlarla da danışır.

✍️"Ulusum".az