Bu gün Azərbaycanda bələdiyyə seçkiləri keçirilir

Yanvarın 29-da Azərbaycanda bələdiyyə seçkiləri keçiriləcək.

“Ulusum”.az xəbər verir ki, Seçki Məcəlləsinin tələblərinə əsasən bələdiyyə seçkiləri Mərkəzi Seçki Komissiyası tərəfindən təyin edilir. Bununla əlaqədar müvafiq qərar səsvermə gününə azı 60 gün qalmış rəsmi dərc olunur. Digər seçkilərdən fərqli olaraq bələdiyyə seçkilərini Mərkəzi Seçki Komissiyası elan edir. Bu seçkilər hər 5 ildən bir keçirilir. Sonuncu bələdiyyə seçkiləri 2019-cu ildə keçirilib.

Seçkilərlə əlaqədar seçki məntəqələri səhər saat 8:00-da açılacaq və səsvermə 19:00-a qədər davam edəcək.

Seçkilərdə 685 bələdiyyə üçün 16 min 96 namizəd mübarizə aparacaq. Seçkilərdə 70 625 nəfər yerli müşahidəçi olacaq. Media nümayəndələri heç bir quruma müraciət etmədən seçkini işıqlandıra bilərlər.

Xatırladaq ki, Azərbaycanda ilk dəfə bələdiyyə seçkiləri 12 dekabr 1999-cu ildə keçirilib.

Azərbaycan Respublikasında yerli özünüidarəni həyata keçirən bələdiyyələrin üzvləri nisbi çoxluq sistemi əsasında çoxmandatlı seçki dairələri üzrə seçilirlər. Seçki əraziləri üzrə aşağıdakı sayda bələdiyyə üzvləri seçilirlər:

1) əhalisi 500-dən az olan ərazilərdə - 5 bələdiyyə üzvü;
2) əhalisi 500-dən 999-dək olan ərazilərdə - 7 bələdiyyə üzvü;
3) əhalisi 1000-dən 4.999-dək olan ərazilərdə - 9 bələdiyyə üzvü;
4) əhalisi 5000-dən 9.999-dək olan ərazilərdə - 11 bələdiyyə üzvü;
5) əhalisi 10.000-dən 19.999-dək olan ərazilərdə - 13 bələdiyyə üzvü;
6) əhalisi 20.000-dən 49.999-dək olan ərazilərdə - 15 bələdiyyə üzvü;
7) əhalisi 50.000-dən 99.999-dək olan ərazilərdə - 17 bələdiyyə üzvü;
8) əhalisi 100.000-dən 299.999-dək olan ərazilərdə - 19 bələdiyyə üzvü.

Müvafiq seçki ərazisi üzrə bələdiyyə üzvlüyünə namizəd kimi qeydə alınmaq üçün namizədliyi irəli sürülmüş hər bir vətəndaş:

əhalisi 99.999-dan çox olan ərazidə - 150;
əhalisi 49.999-dan çox olan ərazidə - 100;
əhalisi 19.999-dan çox olan ərazidə - 75;
əhalisi 9.999-dan çox olan ərazidə - 50;
əhalisi 4.999-dan çox olan ərazidə - 30;
əhalisi 4.999-dan az olan ərazidə - 15 seçici imzası toplamalıdır.

Bələdiyyə üzvlüyünə qeydə alınmış namizədin 3-ə qədər vəkil edilmiş şəxs təyin etmək hüququ vardır. Göstərilən şəxslər dairə seçki komissiyası tərəfindən qeydə alınır.