BMT: "İran etnik azlıqlara qarşı sərt repressiya həyata keçirir"

Dünən BMT-nin İnsan Haqları Şurasının müstəqil Faktaraşdırıcı Komitəsi İranın etnik azlıqlara qarşı kəskin repressiyalar tətbiq etməsi ilə bağlı hesabat yayıb.

Məlumata görə, İran hökuməti 2022-ci ilin sentyabrından başlayan etiraz aksiyaları zamanı dini və milli etnik xalqlara qarşı ədalətsiz məhkəmələr təşkil etmək, qanundan kənar cəzalar, işgəncələr verməklə, cinsi təcavüz və psixoloji təzyiqlərə məruz qoymaqla kəskin repressiyalar tətbiq edib.

BMT-nin Faktaraşdırıcı Komitəsinin yaydığı hesabatda etnik xalqların azyaşlı uşaqlarının da yuxarıda qeyd olunan cəza növləri ilə üzləşdiyi bildirilib. Faktaraşdırıcı Komitə insan hüquqlarının pozulmasının xüsusilə qadınlara, uşaqlara və etnik, dini azlıqlara daha çox təsir etdiyini vurğulayıb.

Hesabatda edam saylarının da etnik azlıqlar arasında xüsusilə artdığı, bu cəza növünün qadınlara da tətbiq edildiyi diqqətə çatdırılıb. (GADTB)

Eltun Məmmədov