2 İyul – Azərbaycan Polisi 107 yaşında

1918-ci ildən əsası qoyulan Azərbaycan polisinin fəaliyyətindən bu gün 107 il keçir. Ulu Öndər Heydər Əliyevin 1998-ci ildə imzaladığı Fərmana əsasən, bu şərəfli peşənin bayramı olan Polis Günü artıq 26 ildir ki, rəsmi şəkildə qeyd olunur.

2 İyul – Şərəfli Peşəyə Sədaqət Günü

Bu gün sadəcə bir tarix deyil – bu gün fədakarlıqla, sədaqətlə və vicdanla yaşanan bir yolun, dövlətçiliyimizin sarsılmaz dayağı olan şərəfli peşənin bayramıdır.

Azərbaycan polisinin möhkəm və milli təməl üzərində formalaşmasında Ümummilli Liderin rolu əvəzsizdir. Onun rəhbərliyi dövründə Daxili İşlər orqanları gücləndirildi, şəxsi heyət peşəkar və vətənpərvər kadrlarla formalaşdı.
1988-ci ildə Ermənistanın hərbi təcavüzü zamanı düşmənin qarşısında ilk dayanan nizami qüvvələr də məhz milis və Daxili Qoşunlar oldu.

Bu gün Azərbaycan polisi – təkcə qanun keşikçiləri deyil, həm də xalqın gözü, dövlətin nəbzi, ədalətin nəfəsidir. Onlar forma ilə deyil, ruhla bu şərəfli peşəyə xidmət edirlər. Fırtınalı gecələrdə, səssiz səhərlərdə səngiməyən ayıqlıqla və səssiz qəhrəmanlıqla.
Bu gün Azərbaycan polisi, dünənin şücaətini daşıyaraq, sabahın əmin-amanlığını təmin edən əsas qüvvədir.

Bayramınız mübarək, Azərbaycan polisi! Şərəfli peşənizin qüruru daim yaşasın – qoruyun, yüksəldin, var olun!

R.İkramlı
Ulusum.az