Sözün Zəfəri: İki Qardaş Xalqın Ədəbi Körpüsü - FOTO - VİDEO

Milli-mənəvi dəyərlərimizin yaşadılması, ədəbi irsimizin qorunaraq gələcək nəsillərə ötürülməsi yolunda atılan möhtəşəm bir addım olaraq, unudulmaz şairimiz Cəfər Cabbarlının 125 illik yubileyi və türk ədəbiyyatının böyük fikir adamı, maarifçi lideri Ahmet Kabaklının 100 illik xatirəsinə həsr olunmuş iki dəyərli kitabın nəşri həyata keçirildi.

Bu unikal layihə Azərbaycan Yazıçılar Birliyinin “Qobustan” jurnalı ilə Türkiyənin “Türk Ədəbiyyatı Vakfı”nın eyni adlı nəşri tərəfindən ərsəyə gətirilərək, iki qardaş xalq arasında ədəbi-mədəni körpünün daha da möhkəmlənməsinə xidmət edən bariz bir nümunəyə çevrildi.

Təqdimat və anım tədbirləri – Bakıdan Sumqayıta, Siyəzəndən Xızıya qədər bir çox bölgəmizdə böyük coşqu ilə qeyd olundu. Əvvəlcə Bakıda – Azərbaycan Yazıçılar Birliyində, daha sonra Sumqayıt şəhərində Əli Kərim Poeziya Evində, sonda isə Siyəzən şəhər Mədəniyyət Mərkəzində keçirilən görüşlərdə qardaş Türkiyədən gələn dəyərli qonaqların iştirakı tədbirlərə xüsusi rəng qatdı.

Siyəzən rayon İcra Hakimiyyətinin başçısı, tanınmış ədib Novruz Novruzovun təşkilatçılığı ilə gerçəkləşən bu tədbir, söz adamlarının və ziyalıların bir araya gəldiyi yaddaqalan bir ədəbi-mədəni platformaya çevrildi.

Tədbirdə ölkənin tanınmış yazıçıları, alimləri və mədəniyyət xadimləri iştirak edərək, Ahmet Kabaklının zəngin mənəvi və elmi irsinə dərin ehtiramlarını ifadə etdilər. Gənc bir rəssamın Kabaklının portretini yaradaraq onu Türkiyədən gələn nümayəndələrə hədiyyə etməsi, sənət və mədəniyyətin birləşdirici gücünün parlaq simvolu oldu.

Türkiyəli nümayəndələr, Ahmet Kabaklının 100 illik yubileyinə həsr olunmuş xüsusi medalları Azərbaycanlı yaradıcı şəxslərə təqdim etməklə, iki xalq arasında mədəni zənginliyə əsaslanan qarşılıqlı hörmət və sədaqəti nümayiş etdirdilər.

Tədbirdə çıxış edən Azərbaycan Yazıçılar Birliyinin sədri, xalq yazıçısı Anar Rzayevin dərin məzmunlu çıxışı isə milli ədəbiyyatımıza olan sevgini və irsimizin qorunmasının əhəmiyyətini bir daha vurğuladı.

Bu silsilə görüşlər sadəcə yubiley və ya anım xarakteri daşımadı – bu tədbirlər eyni zamanda iki dost və qardaş xalqın ədəbi elçilərinin ortaq yaddaş, mənəvi birlik və mədəniyyətlərarası dialoq yolunda atdığı dəyərli addımlara çevrildi. Ədəbiyyatın və sənətin yaratdığı böyük mənəvi güc, bu layihə vasitəsilə mədəni inkişafın rəmzinə çevrildi.

Ulu öndər Heydər Əliyevin "Azərbaycanın gələcəyi onun gənclərinə məxsusdur" fikrindən yola çıxaraq, belə təşəbbüslərin həyata keçirilməsi gənc nəslin maariflənməsi və yaradıcı inkişafı baxımından son dərəcə mühüm əhəmiyyət daşıyır.






Rəxşəndə İkramlı